تقلية بالحمص
ملي نقي تقلية ونغسلها مزيان كنديرها تترقد واحد نصف ساعة في الماء والخل ، من بعد كنغسلها مزيان ونديرها في الكسكاس باش تفور واحد نصف ساعة ، ( ملي كتفور إلى بغيت نطيبها ديك الساعة كنطيبها ، وإلى مبغيتش كنخليها حتى تبرد مزيان ونيرها في أكياس بلاستيكية وندخلها للمجمد ، وقت اما بغيت نطيبها كنخرجها واحد الساعة قبل من المجمد باش يالله ترخى ويزول عليها الثلج ، حيث ماكنديرهاش في الماء بعد ماتكون تفورات )
المقادير :
تقلية مفورة
حمص مرطب ليلة كاملة في الماء
كأس إلا ربع زيت زيتون وزيت المائدة
بصلة كبيرة مشنفة + 4 فصوص ثوم محكوكين
حبة طماطم متوسطة مقطعة طريفات ( أنا كنديرها بقشورها )
قبطة قصر ومعكنوس مقطعين رقاق
العطرية = سكين جبير - خرقوم - تحميرة - كمون - إبزار - ملح .
الطريقة :
ندير الزيت في الطنجرة تسخن ونضيف عليها التقلية والملح ونخليها تتشحر
من بعد ما تشحرت التقلية كنضيف عليها البصلة والثوم ونخليها حتى تتشحر مزيان وطيح شوية البصلة
نضيف عليها الطماطم والقصر والمعكنوس ، نغطي عليها ونخليها شوية على نار هادئة
نضيف العطرية ونخلها واحد شوية من بعد كنحركها مزيان ونضيف الماء طايب الجهد الكافي
ونخلها طيب على خطرها على نار هادئة . ( إلى كان باقي خصها الماء كنزيد شوية بشوية الماء طايب )
ملي تقرب طيب تقلية نضيف عليها الحمص ونخليها تكمل طيبها .
ملي طيب التقلية ويطيب الحمص وتولي المرقة خاترة ، نضيف عليهم شوية قسبر ومعكنوس ، نحيدها من فوق النار ونقدمها ،
بألف صحة
.jpg)
إرسال تعليق