طورطة بريزي بالكريمة و الفواكه

المقادير و الطريقة مع الصور 

125 غ زبدة باردة من الثلاجة مباشرة

زدت عليها 80 غ سكر كلاصي و خلطتها مزيان حتى تجانسو

من بعد زدت 2 اصفر بيض و معلقة فاني غبرة

وخلطت المقادير مزيان مزيان

من بعد زدت 250 غ دقيق مغربل مع شوية ملح

و بديت كنخلط بيدي وانا كنحك الخليط بين يديا فحال سكسو

حتى كتجمع انا مضفتش الما و الي مبغاتش تجمع ليها تزيد معلقة كبيرة ديال الما باررررد

و كنخلفها و نديرها فالثلاجة لمدة نصف ساعة

ثم وجدت شوية الناباج بنصف كاس ديال الما مع معلقة سكر سنيدة و طرف من قشرة الحامض ونخليه يغلي

حتى كيعقاد فحال هاكدا

من بعد ما ارتاحث العجينة كنطلقها

وكنخليها شوية غليظة تقريبا سنتيم

كنهزها بالمدلك مباشرة للمول دهنتو بشوية الزبدة

وكنسرحها فالمول و انا كنبرك وكنقطع الجناب بالمدلك

هاهي وجدات و تكيتها فالفورشيط و كندخلها طيب حتى تتحمر شوية

وكنت وجدت كريم باتيسير و باررردة

وزدت عليها جبن جوكي

وعمرت بيها الطارط بريزي

وزوقتها بالفواكه و ووريدات من العجينة الي شاطت من البريزي ودهنت الفواكه بالناباج الي وجدنا