طارت الطبقات مذاق جديد ولذيذ

طارت الطبقات مذاق جديد ولذيذ

المقادير : 

الطبقة 1 الكيكة :
3 بيضات
كاس صغير سنيدة
1/2 كاس زيت
1/4 كاس ماء مغلي مذوب فيه معلقة كبيرة كاكاو (ممكن تزيدي قهوة)
كاس و نصف طحين
1 خمارة
( نفس كاس العبار والكاس يكون صغر من كاس ديال العنبة) 

طريقة التحضير : 

بحال اي كيكة طربي البيض مع السنيدة وتزيدي الزيت والكاكاو ثم الطحين مغربل مع الخميرة

ودخليها الفرن 

 ملي طابت قطعتها على حساب الاطار لي عندي

الطبقة 2 :

1/2 لتر حليب 

3 معالق كبار كريم باتسيير

1 بيضة

80 غ شكلاط اسود مذوب مع معلقة صغيرة الزبدة

زلافة صغيرة كركاع محمر و مهرمش

روح كراميل انا استعملت 3 معالق كبار كراميل ديال نيدو 

سنيدة حسب الذوق

طريقة التحضير : 

طربي بالفورشيط البيضة مع غبرة كريم باتسيير وسنيدة وزيديه على الحليب وحركي حتا يعقاد
زيدي عليه الكراميل (ايلا عندك غير نكهة استعمليها من الاول مع الحليب)
ثم الشكلاط مذوب
واخيرا الكركاع

وكبيه على الكيكة ودخليها تبرد على منوجدو الطبقة 3

الطبقة 3 :
كاس كبير عصير الليمون
3 فلان شكلاط او كراميل ديال درهم
سنيدة حسب الذوق

طريقة التحضير : 
حركيه حتا يعقاد وكبيه على الطبقة الثانية غير بشوية انا كنستعمل صفاية باش ميتقبش ليا الطبقة الثانية

دخليها الثلاجة حتا تبرد وزوقيها حسب الرغبة

انا زوقتها بخطوط بشكلاط  وقطع الشكلاط على شكل شيبس 

وبالصحة و العافية

من تحضير صديقتي : أسماء عزيز